/ natur / Uro etter funn av multiresistens i svenske grisar

Multiresistente bakteriar (MRSA) har vorte funne i grisar i Sverige. Dei er resistente mot ei stor gruppe antibiotika, inkludert penicillin.

Ei undersøking frå det svenske veterinærinstituttet, som vart gjort i samband med ein EU-studie, viser at MRSA finst blant svenske grisar. Det er likevel ikkje fastslått kor utbreidd det er, men studien skal halde fram gjennom heile 2025.

MRSA kan forårsake infeksjon hos både menneske og dyr, og er vanleg blant grisar i mange land – men Sverige har så langt i stor grad vore spart. Bakterien kan overførast frå dyr til menneske, men er ikkje venta å spreie seg gjennom mat.

– Vi ser ein risiko for at folk som jobbar med grisar, til dømes på gard eller som veterinær, kan bli berarar av desse bakteriane, seier antibiotikaekspert ved veterinærinstituttet, Oskar Nilsson.

Men ettersom det ikkje gjeld så mange i Sverige, trur han ikkje helsestyresmaktene vil ha problem med å handtere eit eventuelt utbrot.(©NPK)