/ natur / Første folkepanel med tilrådingar til eit meir berekraftig forbruk

Kjell Åsmund Sunde, NPK

Å løyse naturkrisa er ikkje gjort i ei handvending, men no kan kanskje folk flest få vere med å avgjere kva grep vi må ta – før det er for seint.

– Det er mange samtalar om å få i gang eit folkepanel for naturen, fortalde Cathrine Skar under ein panelsamtale om naturkrisa nyleg.

Ho var ein del av sekretariatet som stod bak det første folkepanelet som tidlegare i år leverte ein rapport med tilrådingar til eit meir berekraftig forbruk her i landet. Folkepanelet var sett saman av 66 personar som blei trekt ut med ein demografi basert på kjønn, alder, landsdel, utdanning og haldningar til berekraftig forbruk.

Lokalt eller nasjonal?

Skal ein få eit folkepanel som skal jobbe med naturkrisa er det ein del grunnreglar som må plass. Framleis er det mykje uvisse rundt kva eit eventuelt mandat for eit slikt folkestyrt naturpanel skal vere.

– Kva dilemma hadde det vore relevant å ta for seg om ein først skal gjennomføre eit slikt folkepanel? Hadde det vore mest nyttig å gjennomføre det på eit nasjonalt nivå eller ute i lokalsamfunna? Kva delar av naturspørsmålet er aller vanskelegast? Det er ein prosess å komme fram til dei dilemma der det er store motsetnader, og det er først og fremst der folkepanel har ein funksjon og kanskje kan bidra til endring, sa Skar.

Vil ha kunnskap

«Viss det er så alvorleg som dette – kvifor har ingen fortalt det før?»

Ifølgje Skar var dette eitt av spørsmåla eit samla folkepanel stilte seg då dei jobba fram tilrådingane til berekraftig forbruk. Som ein del av folkepanelmetodikken fekk nemleg panelet ei grundig innføring i tematikken og eitt breitt kunnskapsgrunnlag å arbeide med.

– Rapportar og forsking når ikkje ut til dei som ikkje deltar aktivt i politikken eller i organisasjonslivet i Noreg. Dei fleste stolar på at politikarane gjer noko med dei tinga som er alvorlege. Så det viser kor viktig det er at vi på ein meir systematisk måte må få fram kunnskap til folk og gi dei moglegheit til å ta han i bruk, sa Skar.

Ho meiner òg at folkepanel kan auke engasjementet blant folk.

– Når desse 66 personane kjem tilbake til lokalsamfunna sine melder dei seg kanskje inn i eit politisk parti eller lokal organisasjon og det er i det engasjementet der det ligg noko spennande. Så ein kan spreie både kunnskap og engasjement gjennom folkepanel, sa Skar.

(©NPK)